صباح بيقاوم الهزيمة

ده اول صبح (بدري) أعيشه من شهور..

صباح الخير

يا سم ع التكشيرة

النبي تبسم يا مصريين

كل الوشوش كارهه نفسها

تحسهم موتى من العصور الوسطى

قاموا يشربوا الشاي باللبن (او القهوة ام لبن برضه)

وراجعين يموتوا تاني

ولا يمكن انا اللي ميت

ومش واخد بالي

ومش يمكن نكون انا وهما اصلا في الاخرة

وبنتحاسب

🔻⭕🔻

عبوس وجوه المصريين في الصباح

بيأكد انهم كانوا كفار في أزمنة غابرة

وربنا بيعاقبهم بعيشتهم في البلد دي

🔺🔵🔺

موضوع شكل الناس الصبح شغلني

في كل مكان في العالم سافرت ليه

هاختار 3 نماذج اكلمكم عنهم

👇👇👇

♦في الصين.. بكين

وجوه مشرقة وابتسامة تعلو كل الوجوه كأنها مصروفالهم مع الجنسية..

تحسهم نازلين موعد غرامي كلهم نشاط وحيوية

♦في لندن

وجوه متطلعة متحفزة ومتحمسة وكلها غل كأنها داخلة حرب..

ناس نازلة تلتهم الحياة وتنتزع منها كل طموحاتها واحلامها..

جبروت مواجهة التحديات يلخص عظمة الانجليز

♦في الرياض

في اتفاق ضمني ما بين كل سكان المدينة محدش يبص في وش التاني عشان ما يترعبش من كم القرف والغضب اللي بيبقى مسيطر على الناس اللي اكتب عليهم قهرا يصحوا بدري.. ناس مغصوبة ع الحياة وبتقضيها جبر خواطر.. لا فرق في ذلك بين مواطن ومقيم.

👇👇👇

الواحد لما بيفقد ايمانه بنفسه وباحلامه.. بيضعف

بيقف مش قادر يكمل..

بيتخيل ان دي النهاية..

ساعاتها ممكن ينتحر..

مش ضروري يموت كافر..

ممكن يعيش ميت.

هذا هو حال المصريين في صباحهم ومساهم

كما أراهم

♦️♦️♦️

ورغم ذلك

صباح الأمل والمحبة

صباح بيحلم

وبيترجى نظرة رضا من ربنا

صباحكم مشرق من غير تكشير

ولا انتحار ولا انكسار

#صباح_بيقاوم_الهزيمة 

وبيعشق الانتصار

😁😁😁

صفقة القرن

وتبقي لذة بالمزة

ولما البيرة تتشبر

وتسقع لك

فأرجع لك

نهز السرير هزة

ينط الصبح على كتفي

أطلب فول

وأتغذى

أرسم ع الكفوف نجمة

تاخدني الصفقة على غزة

هزيني

كمان هزة

وغني لي كمان وكمان

وع الدبكة.. نزف "جولان"

لا أنا سوري.. 

يا عيب الشام

ولا مصري.. 

ولا ليبي

يا ريت تقول لي يا حبيبي

أنا المسحور بحب الشرق

يا أجمل بنت عربية

بس ده اخري.. سامحيني

أشرب.. 

واهز السرير هزة

واصدق لما ابيع عرضك

اني وهبتك العزة

#صفقة_القرن

تقلع.. تقنع.. تطلع !!

كل واحد في (كارنا)

كار الجرانين (الإعلام حالياً)

بيجيله يوم معلوم

بيقف ع المنبر

ويمسك الحديدة (الميكرفون) 

ويخطب في الناس ويتجلى ويقول..

ويغزل في كلام معسول..

تقدر تقول انه كاس وداير على (أهل الكلام) جميعا..

الا من رحمه الله 
ورزقه بعيدا عن المنابر (جرايد أو قنوات مصرية).. وتتازلاتها..

اما اللي بتيجي رجله..

فكل واحد وشطارته..

وكل واحد وقدرته على المناورة..

فيه ناس نجحت تعمل توازن

بين المفروض والمفترض

بين اللي بيمليه أحمد

وبين مراعاة رب أحمد

الكلام ده طبعا بايت وقديم شويه

لان دلوقتي الشرط الوحيد لطلوع المنبر

هو انك تكون عريان

سلط.. ملط

ولازم تقنع الجمهور 

بأن مفيش مستور

لو نجحت هاتطلع #كل_يوم

ولو رفضت تقلع او فشلت تقنع

هاتتصنف على انك مش وطني 

او مش مهني

اختار بقى مصيرك؟

والله الموفق والمستعان

#تقلع_تقنع_تطلع_اعلامي

اللي معاه ربنا

هي دي سنة الحياة

وحكمتها

انك تكبر دماغك وما تزعلش

ورغم ان دور الحكيم اوقات بيبقى رخم

وبتبقى عايز تقلع الحزام والجزمة

وتشتم وتسب

تزعق وتصرخ

زي نور الشريف في اخر فيلم «سواق الاتوبيس»

وتقول: يا ووووولاااااد الكلب.

 وبعدين 

تقول الطيب احسن ما يستاهلوش

👇👇

عن علاقتنا بالبشر اللي حوالينا احدثكم

من دايرة البيت (الاهل).. للاصدقاء.. للمعارف (الحقيقيين والافتراضين)..

لجمهور القراء (اللي بيتناقصوا كل يوم وقربوا ينقرضوا)..

لكل الناس اللي بتربطك بيهم صفة او علاقة او صداقة.. دائمة او عابرة

البشر اللي بيبقوا زي ضلك لما تكون مهم (في نظرهم)

او غني (وعايزين يقلبوك)

او جدع (وعايزين يستنزفوك) 

👇👇

قربهم وبعدهم

حبهم وكرههم

سؤالهم واختفاءهم

جدعنتهم وندالتهم 

ردهم للجمايل

ووقفهم جنبك في المحن

السؤال في المرض

والسؤال من غير غرض

👇👇

موال كبير عن علاقة (بنت وسخة) ومش مفهومة

لو توهت في دوامتها مش هاتخلص

وهاتعيش عمرك ندمان على كل لحظة جدعنة عملتها في حياتك

وهاتقرر «تعيش ندل وتموت جبان»

ولأنه قرار غبي

وأنت ما تستاهلش النهاية دي

خد قرارك الصح

كل شى بتعمله في حياتك خليه لوجه الله

وما تنتظرش من البشر.. 

تقديرك عند رب البشر

واللي عند ربنا ما بيروحش

واللي معاه ربنا.. يا سعده

#اللي_معاه_ربنا 

اللي أوله شخر.. أخره بحر

واقف لوحدك بالليل في الصحرا.. 

والديابة بتعوي..

لقيت كده فجأة عربية كاروووووه مهكعة
فرحت.. 

ركبت.. 

وقلت يا فرج الله

شويه..

وابتدى السواق يمشي في سكك غير اللي تعرفها..

والعربية عماله تتمخمض..

بطنك قلبت وقربت ترجع
وكل ما تصرخ في السواق اللي اضطريت تركب معاه
يقولك: اخرس يالا

والركاب يردوا معاه: ما تخرس يالا.. هاتنزل يالا

واحد ناصح منهم يشرح لك بقرف

الأسطى بيخرم من سكة جديدة.. عشان نوصل بسرعة..

تبص حواليك للركاب تلاقيهم.. 

متنحين 

وساكتين 

مطب جديد.. 

العربية تتهبد بيك
هاتستنطىء خلاص (وتقرفنا)
تصرخ تاني في السواق.. 

يبص لك بغضب

ويشخط فيك (كما لو كنت بتشتغل عنده)
والركاب يرهبوك بنظراتهم 
وواحد فيهم من الركاب الشرفاء 
يزغدك في كتفك ويقولك بسهوكة: ما تهمد يالا.. اخرس يالا

نطع تاني منهم يقولك في ودنك وبأسلوب تحذيري شخيري:

لو (الأسطى) سمع صوتك تاني مش هايكمل

وهايقف بينا..... ونتعطل واحنا مش ناقصين تأخير يا روح أمك

وفجأة كل الركاب الخرس ينطقوا ويطلع لهم صوت..

ويهددوك لو اتكلمت تاني هايدفونك في الصحرا

يبقى ادامك حل من اتنين 

يا تنزل في وسط الطريق.. وتتوه
وتغرق في شبر ميه
يا تكمل وانت حاطط جزمة السواق في بؤك
وتحترم نفسك..

لانك لو (استفرغت) هاتبهدل الدنيا

وفجأة في نص الرحلة
السواق بطلع لك (لامؤاخذة) العلبة
ويقولك فيها ايه دي يالا؟
فتعمل ناصح وتقوله: فيها فيل

فيروح (التباع) اللي معاه رازعك قفا مكيفك
ما هو كل سواق لازم يكون معاه تباع (دراع)
ويقول لك: لا يا روح أمك
ده فيه كارت شحن بـ100 جنيه يا خبوء

وكسبت معانا يا فقري..

ويروح زاقك من المركب في وسط البحر
وكل اللي الركاب يقوموا يرقصوا ويغنو
ويشاوروا عليك..
شمر يالا.. ركبك يالا

#اللي_أوله_شخر_اخره_بحر

إنتخابات الرئاسة المصرية

صدقته وباحبه و #هنتخب_الريس_تاني

قصدي خامس مرة

#هانتخبك_يا_ريس بس لفترة أخيرة.. كفاية كده

وعندي شرط وحيد

إنها تكون انتخابات رئاسية حقيقية

وكفايانا.. إستنخابات

ويكون فيها وجوه جديدة تترشح بجد وتنافسك

وصدقني يا ريس الناس هاتختارك برضه..

كلنا بنحبك وما نقدرش نعيش من غيرك

وعارفين صعوبة إدارة دولة بحجم مصر

ومشقة قيادة شعب زينا إحنا.. المصريين

يا ريت تخلينا نختارك بين مرشحين محترمين

هايبقى شكر حقيقي وعرفان ببطولتك

لأنك تحملت المسئولية في لحظة صعبة

وراهنت بعمرك عشان تحمي مصر

أنت الوحيد اللي تقدر تدعم مرشحين ضدك

عشان مصر تعيش تجربة انتخابات تليق بها

وياريت الموتى والفاشلين

يمتنعوا عن الترشح أو الظهور في المشهد السياسي..

مع تقديرنا للي قدمه بعضهم..

حان الوقت انهم يدركوا ان الزمن تجاوزهم خلاص ..

وأخيرا

أعظم ما يمكن أن يقدمه أي رئيس لمصر

هو انه يؤسس لعملية انتقال طبيعية للسلطة

بدون عقبات او عثرات او فوضى

تهد كل اللي بنبنيه

وتضيع اللي بنضحي بيه

عشان نحيا في وطن أمن لينا ولولادنا

والكلام ده باقوله

للي #عوزينه_للاخر

وللي #مش_عايزين_الريس

انتخابات الرئاسة  فرصة عظيمة

أتمنى ألا تضيع على مصر..

**الفقرات السابقة جزء من نص قديم لم ينشر (تم تطعيمه بالهاشتاجات فقط)

ويرجع تاريخه إلى عام 2005.. أيام "مبارك وفرصه الضائعة"

وجدته متخفياً في أرشيفي الشخصي

 #انتخابات_الرئاسة_المصرية

خير الناس

لو عايز تعمل خير وفلوسك قليلة

تسمح لي اقولك على فكرة متجربة..

اشتري بفلوسك القليلة كام علبة عصير

واملا من الحنفية (ام فلتر) كام ازازة مياه..

وعلى اقرب مكتب تأمين صحي لبيتك..

هاتلاقي هناك اهالينا من كبار السن

اللي رايحين يصرفوا علاجهم الشهري..

هاتلاقي ريقهم نشف من عذاب الروتين الحكومي 

اللي بيتعامل بمنتهى الغباء والظلم مع ناس المفروض يكون لهم تقدير خاص 

وهما في خريف عمرهم..

لا دكتور ولا موظف ولا تمرجي

بيقدروا إحساس العجوز بالعجز

المهم ..

وزع أنت العصير والميه عليهم..

واعرض مساعدتك على اي محتاج من الكبار الموجودين..

ممكن تخلص لحد فيهم ورقه

او يتسند عليك وهو بيتحرك بين الأدوار والإدارات..

وربنا هايكرمك بدعوة حلوة

يا ريت لو خصصت ساعة بس من وقتك اسبوعيا..

ويا سلام لو اخدت ابنك الصغير معاك

اعتقد انك مش بش هاتكسب ثواب

هاتكسب طاقة كبيرة تنفعك في حياتك

وهاتبقى كمان زرعت لمستقبلك وشيخوختك

شجرة تضلل عليك وتحميك من قسوة الأيام

وقبل ما أختم وبمناسبة الخير وسككه

عايز اتكلم عن شنط وكراتين رمضان..

اللي بنريح بيها ضمايرنا

ربنا ما يقطع لنا عادة

يا سلام بقى لو نبدع حاجة جديدة نساعد بيها الناس

لان معظمهم ما بيستفيدوش من الشنط والكراتين

السلع اللي في الشنط دي  بتكون سيئة.. والفقير بيقرف يستخدمها

وفي الغالب.. الكراتين دي بتلف من فقير بيبعها رخيص لبلطجي في منطقته

ومنها لكبار التجار.. عشان نرجع احنا نشتريها تاني ونعيد الكرة

وبالمناسبة برضه

لكل حبيايب قلبي ستات البيوت الطيبات الصالحات

أمي وزوجتي وأختي وبنتي الغاليين

همسة في أذن (كلكن)..

طهي الطعام للفقرا ثوابه اكبر..

ربنا يديكوا الصحة والعافية

ويقدركوا ويقدرنا على الخير

#خير_الناس

اصحي يا مصر

حمام الملاطيلي.... فيلم اسمه (فقط) كان يثير جيل بأكمله

خلق منه "المنع" متعة استثنائية في تاريخ الفرجة السينمائية.. وصنفته يافطة (للكبار فقط) في قائمة أفلام السيكو سيكو، فسقط أسمه من قائمة الأعمال المهمة والمميزة التي تليق بقدر صناعه.. الكبير صلاح أبو سيف.. رائد الواقعية في السينما المصرية، ومعه الفنان المتفرد محسن زايد السيناريست الكبير الذي كتب الفيلم عن قصة للروائي إسماعيل ولي الدين، أما الممثلين فكانوا مجموعة مجتهدة من ممثلين زمانهم..

يتقدمهم نجمة الإغراء في زمانها شمس البارودي

ويشاركها البطولة المعتزل محمد العربي

كان أبرز  ما الفيلم الإطلالة الصاروخية للراقصة نعمت مختار

بالطبع لن ينسى تاريخ السينما جرأة يوسف شعبان في تجسيد دور الشاذ لأول مرة في مصر..

تربطني علاقة خاصة مع حمام الملاطيلي.. ليس فقط لأن عمره من عمري.. فكلانا من مواليد 73..  لكن لأن مشاهدته لأول مرة في السينما عام 1989 .. تجربة لا تنسى.. كان ذلك في سينما دوللي بشبرا قبل أن يتم تجديدها..

وكانت سينما شعبية تعرض 3 أفلام في بروجرام واحد ..

بالطبع هي أسوأ تجارب المشاهدة في حياتي..

الجمهور "ترسو" طبعا.. والفيلم محذوف نصه..

نجحت بعدها بشهور في الوصول لنسخة فيديو كاملة..

وقبل أيام شوفته للمرة الثالثة

اللطيف .. 

إني كل مرة أضحك مع مشهد النهاية.. 

رغم ان الحدوتة مأساوية جدا جدا.. 

والسبب تكرار جملة (اصحي يا مصر) المباشرة على لسان شخصية الدرويش.

الفيلم حالة من المواجهة القاسية مع النفس

وفيه تعرية لجوانب مسكوت عنها في المجتمع المصري..

فيلم مهم..

للأسف مانقدرش انهارده نعمل فيلم بجرأته..

#اصحي_يا_مصر

كيف تكونان أما وأبا أفضل؟

لحد انهارده لما بتواجهني مشكلة.. 

باجري بسرعة على مكتبتي وافضل عايش بين الكتب.. 

بادور على العنوان (الدوا) اللي هايقدر يحل مشكلتي أو يداوي علتي.. 

من وأنا صغير.. 

عندي ثقة كبيرة في الكتاب.. ثقة بالفطرة.. 

وده سبب انه في مكتبتي عناوين في كل مجالات الحياة..

انهارده بالصدفة لقيت كتاب مهم

أول مرة أشوفه في مكتبتي..

أكيد اشتريته ونسيته..

عنوانه: «كيف تكونان أماً وأباً أفضل»..

وتحته عنوان فرعي مكمل بيوضح ويقول: 

«مهما كان سلوك أبنائكما سيئا، أو مهما كنتما منشغلين عنهم».

عنوان طويل بس ساعة الطول بيبقى مهم ومؤثر..

عشان يقدر يوصل إلى الأعماق ويلمس جواك أوجاعك وهمومك.. 

جايز تصادف فيه حل لمشاكلك مع ولادك.. 

وتقدر تفهم الصعوبات اللي بتواجهك في تربيتهم..

ويا سعدك يا هناك.. لو لقيت حلول وأفكار تساعدك في التعامل معاهم

أولادنا هما الحلم الأهم والأغلى علينا في الدنيا 

وكلنا نفسنا ما تقصرش فيه ابدا.

خلال ساعة كنت قريت أجزاء مهمة من فصول متفرقة من الكتاب.. 

فيه مشاكل ابهات وامهات تشبهنا..

لقيت مشاكلي مع ولادي.. 

ولقيت حلول سهلة وبسيطة للمشاكل اللي كنت شايف ملهاش حل..

الكتاب ده ممكن فعلا يقدر يساعدنا في تربية أبناءنا من الطفولة إلي المراهقة

 ومن أهم عناوين فصول الكتاب..

• Ø     مهارات الأمومة والأبوة
• Ø     فوضى وجبات الطعام
• Ø     الاطفال المتعبون
• Ø     ظروف صعبة
• Ø     المشاحنات الأخوية
• Ø     الجريمة والعقاب
• Ø     المدرسة والواجبات المنزلية
• Ø    المكافأت والاغراءات

ومن مقدمة الكتاب.. هذه الفقرة التي توضح أسلوبه

لا تتشابه الأمومة والأبوة مع أي جانب آخر من جوانب الحياة، حيث أننا نستطيع أن نتقدم وننجح إذا حاولنا تحليل الخطأ الذي وقعنا فيه، وأسباب وقوعه وعملنا على إصلاحه . فمثلاً إن كان هناك طفلة ترفض القيام بواجباتها المنزلية، وتستمر في الرفض على الرغم من عدد المرات التي يطلب منها والداها فعله وإلحاحهما بقولهما «افعليه ، افعليه ، افعليه».. عليهم إيجاد أسلوب آخر في المعاملة، وكما يقول العالم ألبرت أينشاتين : «إن تعريف الجنون هو فعل الشي نفسه مراراً».

الكتاب صادر عن المركز القومي للترجمة (التابع لوزارة الثقافة المصرية)

تأليف: كاساندرا جاردينة، وترجمة: منى الدروبي

#الكتاب_الصاحب_الجدع

بص العصفورة.. ومصر المحشورة

دايما ألاقي نفسي أمام فخ الاختيار القبيح!

يا أساند حرية دكتورة جامعية وحقها

انها ترقص على السوشيال ميديا

يا اما اصرخ رفضا لفجاجة الظهور السخيف المبتذل

لسيدة ناضجة من المفترض انها قدوة لطلابها..

وكأنه بقى قدري وقدر كل المصريين

كل يوم قصة متناقضة مع نفسها تلخبطنا

وتحيرنا نختار نبقى مع الباطل على الباطل

ولا نضيع الحق عند عبد الحق

طبعا مش فاهم

جايز تفهم لما تسمع القصة دي كمان

الرقاصة أو الاعلامية أو الفنانة الست سما المصري ..

اللي الحقيقة مش عارف هي بتشتغل إيه بالظبط ..

فجأة قررت تطلع ديني.. في برنامج

والست فورا ظهرت على الفضائيات

عشان تجاوب ع التساؤلات

ولا انت فاهم جدها من هزلها

والست برضه بتتكلم عن حريتها وحقها 

وانها.. ناوية تتحجب مخصوص عشان تطلع الديني

وبعيدا عن أصواتك

أو حركاتك

اللي هي رد فعل طبيعي لكلامها وبرنامجها

عارف انك هاتصرخ وتقول ايه التناقض ده

هاقولك: ده مش تناقض ..

هي دي مصر يا عبلة :)

مصر الكشري.. والبزرميط

مصر الجهل والعتمة في عصر السماوات المفتوحة

مصر اللي بترقص على السلم

ومش عارفة تبقى اوربا.. ولا ينفع تكون افغانستان

مصر اللي مش عايزه تبني كوبري يحل الأزمة

ويجمع الضدين اللي في دماغنا..

اللي مانعينا ناخد قرار ..

أو حتى نفهم ونختار.

#بص_العصفورة_ومصر_المحشورة