أدم.. في الدوبلكس

شغلتني كتير قصة أدم والتفاحة وخروجه من الجنة..

دايما كنت شايف القصة دي سبب عذاب البشرية.. 

من كام يوم حطيت نفسي مكانه.. 

وفهمت أخيراً هو ليه خد القرار ده..

ليه بقى ؟؟؟؟؟

لأن لو ما كانش سمع كلام حواء

كانت هاتقلب عليه الجنة نار ..

ومع  كل لقمة كان هاياكلها

كانت هاتنكد عليه وتطفحها له ...

وتقول له: «مش لو كنت اكلت تفاحة الخلود يا سي ادم كان بقى عندنا دوبلكس في القاهرة الجديدة.. أنتي اللي حظك فقري يا بت يا حواء عشان جوزك أدم على سن ورمح مش قادر يأكل من الشجرة.. قال إيه عشان ما يزعلش ربنا».

وطبعا الموال ده كل يوم كان ممكن يجنن جدك أدم .

عشان كده خدها من قصيره

وسمع كلامها واكل ونزل معاها الدنيا..

ومن يومها وهو ما بيقولش غير حاضر

اخرج من الجنة.. حاضر

اتعذب في الدنيا.. حاضر

خلف عيال.. حاضر

ربي العيال.. حاضر

مدارس ناشيونال وانترناشيونال.. حاضر

لبس جديد في الهالوين.. حاضر

هدايا لكل المدرسات اللي في مصر

في الماذر داي.. حاضر

مصروف ولعب وحلويات وتابلت وموبايلات

وطلبات ما بتخلصش.. حاضر

وبعد ده كله..

يقولوا: شكرا شكرا.. يا أمي

لا يا عم أدم.. كده حرام

# أدم_في_الدوبلكس

عيل بلدي.. وجدع سوري

استوقفني طفل سوري

شايل في ايده علب من المعجنات السورية..

معمول وبرازق وبيتزا .. ومناقيش بالزعتر

بيبعهم أدام مول شهير في حي راقي بالقاهرة..

شكله نضيف و ملامحه جميلة..  تحس أنه ابن ناس

فضلت أتابعه دقايق..

لاحظت أنه واقف قلقان..

و أترعب لما قربت اشتري منه..

فهمت انه واقف في مكان ممنوع وحاسس بالخطر..

من زمان نفسي اكتب عن سوريا..

بس هأكتب أقول إيه!..

وطوب الأرض كتبوا واتكلموا..

وطوب الارض جابوا سيرتها ومعاها العراق وليبيا واليمن..

في معرض حديثهم عن الامان في مصر

طبعا الطفل السوري الخايف في القاهرة

حاله افصل من أخواته في سوريا..

مع تحفظي على المقارنة

بصيت لولادي وحضنتهم..

وغلبتني الدموع ..

خنقتني..

ومشيت وأنا عيني بتودع الطفل السوري بابتسامة..

وقبل نهاية الشارع فاجئني عيل (بلدي)..

بيفسي عجلة عربية (كيا) بأعصاب باردة .. تلاجة ..

ما تقولش أمين شرطة اسمالله ولا دبلوماسي

على رأي عمنا صلاح جاهين الله يرحمه

الواد لما لمحني شاور لي بالسيجارة وهو بيضحك

وحدفها ناحيتي.. أو بمعنى أوضح .. حدفها في وشي

طبعا زالت دهشتي من الطفل المصري

لما دخلت في (أول شارع يمين)

ولقيت ورشة الأمانة لإصلاح كاوتش السيارات..

ورغم اني برضه متحفظ ع المقارنة

لأني فيه نماذج مصرية كتيرة مجتهدة وتفرح

زي شباب عربيات الاكل.. وعجل (باي بايك)..  

اللي بيقدموا احلى اكل فيكي يا مصر..  

بس ده ما يمنعش إني اقولكم

إن عندنا أزمة أخلاق.. تستحق البكاء..

#عيل_بلدي_ وجدع_سوري

البرشامة الصادقة

البرشامة من أبو شامة

(1)

وإذا بذاك الذي يسقى السم في برشامة

ينمق تلك البرشامة

حتى يبتسم لها المرء وهو "يبلعها"

راضيا وهو عليم بما فيها..!

ولعل في هذا غاية الإعجازالذي يبلغه كاتب.. 

**نقلاً عن رائد الصحافة العربية.. الأستاذ / محمد التابعي**

(2)

والبرشامة

في قاموس المعجم الوسيط

هي نوع من المسامير يُثَنَّى ويُستعمَل للوصل والتثبيت

وجمعها براشيم أو برشام

والمبرشم هو الحادُّ النظر

والبَرْشَمة هي إدامةُ النَّظر

وفي حديث حُذيفة :

كان الناس يَسأَلون رسولَ الله، صلى الله عليه وسلم، عن الخَيْر

وكنت أَسْأَلُه عن الشرِّ

 فبَرْشَموا له أَي حَدَّقوا النظر إليه .

   

(3)

اللي مش هايغير طريقة تفكيره

هايضيع

ويختفي

وعشان احنا اتربينا على وجود «سند»

مثلا 

كانت «المشاية» بتشيلنا.. لما كنا صغيرين

ولما كبرنا لقينا الـ «تصبيرة» هي وجبتنا الأساسية

وفي المدرسة والجامعة قضيناها.. ملخصات.. ومذكرات
وبعد ما أتخرجنا مقضينها جمعيات وابلكيشانات
وأي حاجة تلخص الحياة وتختصر
وتجيب المفيد

وعشان كده.. ظهرت
«البرشامة»

بعد ما بقينا محشورين 

بين تويتة وبوست وهاشتاج

وكله على السخان

برشامة

تشفي الصداع و تعمل دماغ

برشامة 

فيتامين .. منشط ومعين

برشامة

تختصر وتلم

عايزها أب.. تشوفها أم

برشامة 

تنسيك الهم

أبو شامة