كل «حجب».. وله «بديل»

احنا اتاخدنا كلنا ومشينا مغمضين ورا فكرة «الحروب الاعلامية» وجو المؤامرات الكونية اللي عاملها كل البشر ضد كل البشر.

وصحينا يوم من كام سنة لقينا حكوماتنا الطيبة خايفة علينا وعلى عقولنا لحسن حد يخدعنا ويضللنا وياخدنا ورا (مصنع الكراسي) حيث احلى تماسي بعد الشغل القاسي☺️🤫.

السؤال الأول.. 
هل فكر احد من الاخوة الحكماء، ان يذهب في رحلة ليستطلع لنا ماذا يوجد ورا مصنع الكراسي؟

وعشان الكلام الملخبط ما ياخدناش في توهة.. خليني افهمك واحدة واحدة

وأسألك تاني سؤال.. 
هو احنا مرعوبين من ايه؟.. من الاعلام الفاسد او المغشوش او المزيف او المأجور او اللي هو جزء من مؤامرة كونية مرعبة!!

سؤال تاني.. حاكم أنا ناوي اهريك اسئلة.. 
هو ليه الخطر اللي احنا (هما) خايفين منه ده ملوش غير علاج واحد بس مفروض علينا كلنا ومجبرين عليه

👇

وهو المنع ؟؟!!

طيب هو «المنع» جاب نتيجة؟

فيه ناس بتقول أنه حقق نتايج كويسة.. على الأقل منع ظهور أعداء الوطن 

طيب ومع الوقت ايه اللي حصل.. بقى فيه ممنوع.. تحول مع الوقت وبقى مرغوب.. 
ثم مرغوب جدا

أو هروب جدا.. لمنصات أجنبية.. لمخدرات وأستروكس.. وأي حاجة تقضي

حد فاهم حاجة

لو مش فاهم تعالى نرجع عشرين سنة ورا..........

الرجالة طبعا فاكرين (الافلام السكس) اللي كانت بتتهرب في شرايط فيديو سبعينات وتمنينات واول التسعينات.. (انا اسف على التشبيه.. بس الموضوع محتاج نسخن ونصحصح)..

فيه امثلة تانية كتير جيلي هايفتكرها كويس

زي اغاني نجم والشيخ امام

زي افلام شاهين واشهرها (العصفور)

زي جرايد ومجلات وكتب المعارضة في الخارج

الممنوعات طول عمرها كتير 

بس خد بالك انا جبت مثلين عكس بعض

محتوى مدمر (افلام البورنو) يقتل الوعي ويثير الغريزة

ومحتوى ثقافي وفكري ينمي الوعي ويثير العقل للتفكير

تخيل بقى انه في عصرنا الحالي المحتوى المدمر بقى (free) ومتاح للجميع بضغطه ذر على الكمبيوتر وممكن (live) لو عايز 😉

اما المحتوى الثقافي او الفكري فتم منعه حرصا على عقولنا..

والمنع مش حجب مواقع او قنوات او جرايد

المنع حصار مبدعين وحصار عقول المثقفين والاعلاميين

المنع هو الحرمان من امتلاك القدرة على الحلم

المنع هو ان يكون هناك اتجاه واحد فقط في الحياة وغيره خيانة.

أصدقائي المعترضين اللي مش هايعجبهم كلامي 
يا ريت تعيدوا مشاهدة «فيلم ثقافي» لتتذكروا شخصية «برايز»ـ الذي أظنه فارس لكل زمان فيه ممنوع، يقهر اي منع.. ويحل أي مشكلة.. وعلى رأي المثل كل حجب وله رابط بديل.. وكل منع فوق الارض بيولد حركة سرية تحت الأرض.. هذه هي قوانين الطبيعة.. قوانين نيوتن (مش بتاع المصري اليوم.. بتاع الميكانيكا J)

افتحوا الشبابيك ربنا يفتحها عليكم 
المنع بيضيع علينا فرصة اننا نفهم.

والفهم هو السلاح الصحيح لمواجهة اي حروب على العقول

المعلومة تنير.. والمعرفة حق لكل انسان مثل الماء والهواء

#تعرف_برايز

#يالي_هناك_افتح_الشباك